پاکستان تحریک انصاف (پی ٹی آئی) کے بانی چیئرمین عمران خان نے احتجاج سے متعلق علیمہ خان کو نئی تاریخ بتادی۔
اڈیالہ جیل راولپنڈی کے باہر میڈیا سے گفتگو کرتے ہوئے علیمہ خان نے کہا کہ عمران خان نے احتجاج کے لیے 14 اگست کی نئی تاریخ دی ہے، انہوں نے کہا کہ عوام نے حقیقی آزادی کے لیے کھڑا ہونا ہے۔
انہوں نے کہا کہ ملک میں رول آف لاء ختم ہوچکا ہے 14 اگست کو سب لوگ نکلیں، بانی نے اپنی لیڈر شپ کو کہا جیلوں اور گرفتاریوں سے نہ ڈریں، بانی نے واضع کہا ہے جو لوگ نااہل ہوئے ان کی سیٹوں پر کسی کو کھڑا نہیں کرنا، انہوں نے ناجائز طریقے سے لوگوں کو نااہل کیا۔
ان کا کہنا تھا کہ اللہ کا شکر ہے کہ عظمی خان کی عمران خان اور بشریٰ بی بی سے ملاقات ہوئی، ہم تینوں بہنیں اڈیالہ جیل کے باہر موجود تھیں۔
علیمہ خان نے بتایا کہ عمران خان نے بچوں کے پاکستان آنے کے بارے پوچھا، وہ کل کے احتجاج پر بہت خوش ہوئے ہیں، عمران خان نے دباؤ کے باوجود لوگوں کے احتجاج پر خوشی کا اظہار کیا۔ عمران خان کو بتایا گیا خیبرپختونخوا اور پنجاب میں بھی لوگ نکلے ہیں، بانی نے کہا ہے کہ وہ عوام کو خراج تحسین پیش کرتے ہیں۔
عمران کی ہمشیرہ کے مطابق بانی نے کہا کہ ماضی کے ڈکٹیرز نے اتنا ظلم نہیں کیا جو آج ہورہا ہے، یحیی خان نے اپنے اقتدار کے لیے ملک تقسیم کیا، بانی نے کہا ہے آج بھی میڈیا کا گلا بند کردیا گیا،آزادی کے لیے قربانیاں دینی پڑتی ہیں، عمران خان نے اپنے ساتھ رویہ پر کبھی کوئی شکایت نہیں کی۔
علیمہ خان کے مطابق خیبرپختونخوا حکومت کے لیے عمران خان نے پیغام دیا ہے کہ آپریشن بند ہونا چاہیئے، آپریشن پی ٹی آئی کے خلاف نفرت پیدا کرنے کے لیے کیا جارہا ہے، بانی نے کہا کہ مسئلے کو جرگوں کے ذریعے حل کرنا چاہیئے، اگر علی امین گنڈا پور آپریشن نہیں روک سکتے، یہ ان کو سوچنا چاہیے کیا کرنا چاہیے۔